NOVOS FONDOS NA NOSA BIBLIO RELACIONADOS COA CONVIVENCIA

No marco do Plan de Formación Permanente do Profesorado, centrado na mellora da convivencia e na adquisición de recursos para a resolución pacífica de conflitos, o noso centro realizou unha selección de materiais específicos que xa foron adquiridos co fin de reforzar este obxectivo común. Estes fondos están destinados tanto ao profesorado como ao alumnado e ás familias, e teñen como finalidade ofrecer ferramentas prácticas e adaptadas para fomentar unha cultura de paz, diálogo e respecto mutuo en toda a comunidade educativa.

Este investimento en recursos forma parte do compromiso firme do noso cole coa promoción da convivencia positiva como un piar esencial no desenvolvemento integral do noso alumnado. Apostamos por un entorno escolar no que se escoite, se comprenda e se resolvan os conflitos de maneira construtiva, e cremos que a formación e o acceso a materiais de calidade son fundamentais para avanzar cara a ese modelo de escola inclusiva, segura e participativa que queremos seguir construíndo entre todos e todas.

VISITAS Á BIBLIOTECA MUNICIPAL DO CASTRILLÓN

Ao longo do curso, o alumnado de Educación Infantil e algúns cursos de primaria fixeron unha saída á Biblioteca Municipal do Castrillón.

Ademais de gozar dun paseo polas rúas do noso barrio, aprendendo do contorno máis próximo, poidemos aprender moitas cousas sobre as nosas bibliotecas municipais.

Alí, as bibliotecarias e por suposto, o paxaro Ole contáronnos infinitos contos e historias, buscamos misteriosos peixes de prata en libros e investigamos sobre o sistema de clasificación de todos os fondos alí gardados. Para todos, resultou moi enriquecedor compartir experiencias cos biblioteca e tender lazos coa mesma será unha grande oportunidade para a nosa biblioteca escolar.

Invitamos tamén as familias a acudir cos peques, pois seguro que alí poderedes pasar un ratiño moi agradable en familia.

VISITA DE FUTURAS MESTRAS/ES DA UDC

Nas pasadas semanas recibimos a visita de catro estudantes da Facultade de Educación da Universidade da Coruña (UDC), que compartiron co alumnado de 4º de Educación Primaria a lectura do conto Arlo, el osito valiente. 

Esta actividade forma parte do noso compromiso coa formación práctica do futuro profesorado, ofrecendo espazos reais de aprendizaxe onde os estudantes universitarios poden poñer en práctica os seus coñecementos e desenvolver as súas habilidades docentes. 

Foi unha experiencia enriquecedora tanto para o noso alumnado como para os futuros mestres, que gozaron dun momento educativo e emotivo arredor da lectura.

GRAVACIÓN DE PODCAST EN RADIO NA BIBLIO

No cole, o alumnado de 6º de Educación Primaria viviu unha experiencia única ao crear, dende cero, un podcast sobre as Letras Galegas e as pandereteiras, un proxecto que combinou aprendizaxe, traballo en equipo e a exploración de dúas tradicións fundamentais da nosa cultura. Ao longo deste proceso, os nosos rapaces e rapazas non só aprenderon sobre a importancia de celebrar as nosas letras e a figura das mulleres que marcaron historia na música tradicional galega, senón tamén adquiriron habilidades tecnolóxicas e comunicativas para crear e producir un podcast profesional.

Desde a investigación e selección de contidos, ata a grabación, a edición e a publicación do podcast, os alumnos e alumnas foron responsables de todo o proceso. Aprenderon a usar ferramentas de edición de audio, a redactar guions e a falar en público, desenvolvendo ao mesmo tempo a súa capacidade de traballo en grupo. Este proxecto permitiulles afondar nas raíces da nosa cultura galega e transmitir, de maneira creativa, a súa importancia. O resultado é unha obra que non só amosa o seu coñecemento sobre as Letras Galegas e as pandereteiras, senón tamén a súa capacidade para comunicar de forma clara e atractiva. 

Unha gran achega ao noso patrimonio cultural!

CONTINUAMOS COS CONTOS EN FAMILIA

Seguimos a levar adiante a actividade de contacontos en familia nas aulas de Educación Infantil, un proxecto que fomenta o amor pola lectura e a imaxinación entre os nosos pequenos e as súas familias. A través desta actividade, os nenos e nenas, xunto cos seus pais, nais e avós, teñen a oportunidade de compartir historias de xeito dinámico, creando un espazo de aprendizaxe e diversión onde se traballan valores como a creatividade e o compañeirismo.

Cada sesión de contacontos en familia é un momento único para fortalecer os lazos entre a escola e as familias, ao tempo que se potencia a expresión oral e a curiosidade pola lectura. 

DÍA DO LIBRO

 

 Hoxe celebramos o día do libro cun sorriso enorme e o corazón cheo de historias!

Grazas ás familias que colaborastes enviando esas marabillosas fotos dos nenos e nenas co seu conto favorito. Grazas tamén ao profesorado e coidadoras, que compartiron un anaquiño da súa infantia con nós a través das súas foos antigas e cheas de lembranzas.

Como sabedes, estamos construíndo unha nova biblioteca, un espazo cheo de maxia, aventuras e aprendizaxe, onde os contos cobrarán vida e medra´ran con nós.

Porque a literatura infantil é semente, é imaxinación, é emoción e é tamén unha ferramenta poderosa para medrar libres, creativos e felices.

Feliz día do libro a toda a nosa comunidade educativa!

Seguimos escribindo esta fermosa historia xuntas e xuntos.

FORMÁMONOS EN RADIO DA MAN DE REDE ESPORA

O noso cole forma parte da Rede Espora, unha iniciativa que promove a comunicación comunitaria a través da radio como ferramenta educativa e social. Grazas a esta colaboración, temos a oportunidade de participar en actividades que fomentan a creatividade, a expresión oral e o traballo en equipo.

A Rede Espora é unha asociación que impulsa a comunicación participativa mediante a radio, ofrecendo espazos de expresión libre e fomentando o pensamento crítico. O seu obxectivo principal é dar voz ás persoas e colectivos, especialmente no ámbito educativo e social.

O alumnado de 5º e 6º de Educación Primaria participou nunha formación impartida pola Rede Espora, na que se achegaron ao mundo da radio. A actividade comezou cunha charla xeral introdutoria para todo o grupo, na que descubriron como funciona unha emisora e os pasos para crear un programa. A continuación, traballaron en pequenos grupos ao longo de dous días, elaborando contidos, manexando os equipos e desenvolvendo as súas habilidades comunicativas. Foi unha experiencia enriquecedora que lles permitiu experimentar de primeira man o poder da palabra e da colaboración.

Agora só queda comezar a fedellar na radio e crear os nosos Podcast!

Seguimos :)

UN NOVO RECUNCHO PARA SOÑAR ENTRE LIBROS

 

Estamos xa na recta final de renovación da nosa biblioteca escolar e non podemos estar máis ilusionados e ilusionadas! Esta é só unha pequena mostra do novo ambiente lector que estamos a crear na nosa biblio.

Queremos que cada peque atope aquí un espazo acolledor, creativo e cheo de historias por descubrir.

Moi pronto amosarémosvos máis... isto só acaba de comezar!

VISÍTANOS MARÍA CANOSA

Hoxe tivemos a sorte de recibir no noso cole a visita da escritora María Canosa, quen veu presentar ao alumnado de 4º de primaria a súa obra "Escola de Bruxas". Foi unha ocasión moi especial para achegarnos un pouco máis ao seu libro e coñecer de primeira man os segredos que agocha esta divertida historia.

Durante o encontro, María Canosa respondeu con moita cercanía ás preguntas e curiosidades do alumnado, quen puido compartir as súas impresións e resolver dúbidas sobre a lectura. 

Sen dúbida, foi unha experiencia enriquecedora que espertou aínda máis o interese pola lectura e pola maxia que esconden os libros.

RECTA FINAL NA NOSA BIBLIO, TOCA MONTAR MOBLES!

 

Xa estamos na recta final da remodelación da nosa tan esperada biblioteca no CEIP Anxo da Garda, e queremos compartir con todos vós os avances que estamos facendo. Un dos momentos máis especiais deste proceso está a ser a implicación do alumnado de 6º de primaria, que se está convertendo en verdadeiros colaboradores e axudantes nas tarefas de montaxe de mobles e acondicionamento do espazo.

Desde que comezaron as obras, o noso equipo de 6º está a traballar de xeito entusiasta para que a biblioteca non só sexa un lugar onde ler e estudar, senón tamén un espazo para compartir, xogar e aprender. Grazas ao seu esforzo, os novos mobles están tomando forma e, pouco a pouco, a biblioteca vai gañando en beleza e funcionalidade. Desde o montaxe das estanterías ata a organización dos novos espazos de lectura, os voluntarios deste curso están a ser fundamentais para que o proxecto se vaia facendo realidade.

A verdade é que a nosa biblioteca vai ser moito máis que un lugar de lectura; será un espazo vivo, no que non só aprenderemos sobre libros, senón tamén sobre traballo en equipo, organización e responsabilidade. O alumnado está a aprender valiosas leccións de vida que van máis alá dos libros e dos exames: están a ver de primeira man como se leva a cabo un proxecto grande, como se colaboran entre todos para lograr un obxectivo común e, sobre todo, como a implicación persoal e colectiva pode transformar un espazo.

Estamos emocionados de poder compartir con todos vós o progreso e de que, dentro de nada, a nosa nova biblioteca esté lista para recibir ao alumnado, ás familias e a toda a comunidade educativa. Grazas ao traballo e á colaboración de todos, este espazo será máis que unha simple sala: será un lugar no que aprenderemos, imaxinaremos e creceremos todos xuntos.

Moitas grazas á rapazada por todo o seu esforzo e compromiso. E tamén, como non, grazas a todos os que fan posible que o noso cole, o noso Anxo, sexa un lugar onde aprender tamén é vivir. 

Non podemos agardar a que vexades o resultado final!

CHEGOU A PRIMAVERA

 

A primavera chegou, e para celebralo, combinamos diferentes propostas na nosa biblioteca (como está pechada, sacamos os contos as aulas) que permitiron ao alumnado aprender de maneira divertida e dinámica. As aulas mergulláronse nunha selección de contos de narrativa inspirados na natureza, que transmitiron a maxia da estación máis florida do ano. Ademais, incluímos libros informativos sobre o mundo natural, para que os rapaces e rapazas puideran descubrir os segredos da flora e fauna que xorden con forza nesta época.

Pero iso non foi todo! Tamén montamos dúas bandexas Playtray cheas de materiais e actividades de experimentación relacionados coa primavera. Os nenos e nenas tivo a oportunidade de explorar conceptos como a medição de crecemento das plantas, observar as transformacións nas estacións ou descubrir as propiedades da auga e do solo. A combinación de contos, lectura informativa e experimentos prendeu a curiosidade do alumnado, facendo que a primavera se convirtira nunha auténtica festa de aprendizaxe e descubrimentos no noso cole.

A BIBLIOTECA COMEZA A ENGALANARSE!

O equipo de biblioteca está traballando a reo para mellorar a nosa biblioteca e facela máis funcional e acolledora para todo o alumnado. Recentemente, fixemos unha saída a Ikea para realizar unha serie de mercas que nos permitan poñer a punto o espazo e mellorar a experiencia de todos os usuarios. A través desta compra, conseguimos mobiliario práctico e moderno que axudará a optimizar o uso do espazo, favorecendo tanto a organización dos libros coma a creación de zonas máis cómodas e atractivas para a lectura.

Este traballo en equipo non só busca renovar a biblioteca, senón tamén facer dela un lugar máis agradable e accesible onde os nenos e nenas poidan disfrutar da lectura e aprender de maneira amable e cómoda. Estamos emocionados con todos os cambios que estamos facendo e convencidos de que mellorarán moito a experiencia na nosa biblioteca. 

Agradecemos todo o esforzo e implicación do equipo de biblio, que traballa sen descanso para que este espazo sexa cada vez mellor. 

Seguimos traballando para crear un ambiente ideal para o fomento da lectura!

8M DÍA DA MULLER

 

Nestes días celebramos no cole e reivindicamos a forza, a valentía e a loita de todas as mulleres que forman parte da nosa comunidade educativa.

- As nosas alumnas, chegas de talento e futuro.

- As mestras, que educan con paixon e dedicacion.

- O persoal auxiliar coidador, que coida con agarimo e paciencia.

- O persoal non docente, que fai posible que todo funcione.

O equipo da biblioteca do CEIP preparou unha selección especial de libros para recomendar á nosa comunidade educativa. Estas recomendacións, centradas en promover a igualdade de xénero e visibilizar o papel das mulleres na historia e na literatura, foron compartidas co alumnado e as familias para fomentar a reflexión e o debate sobre temas de empoderamento, dereitos e igualdade. A través desta iniciativa, buscamos sensibilizar e promover a lectura de obras que inspiren e eduquen en valores de xustiza social e respectuoso trato entre todas as persoas. Ademais, engadimos algúns elementos propios desta conmemoración para que o mural poidese facer tamén de fotocol!

Xuntas facemos escolar, xuntas facemos historia!

"Matriarcas de mans fortes, corazons grandes... Matriarcas de mirada doce e loita arreo..." Guadi Galego

DÍA DE ROSALÍA

Nesta última semana, os versos de Rosalía encheron as aulas do Anxo e os nosos corazóns.

Aquí vos deixamos o mural que fixemos da man do EDLG e do equipo de biblio do cole, entre todas e todos na nosa lingua, da que asi falaba a propia Rosalía en "Cantares Gallegos".

Para o mural, cada un dos alumnos e alumnas do centro investigou sobre a obra de Rosalía e escolleron os seus versos favoritos para plasmalos no mural, facéndoo así entre todas e todos. Ademais, o equipo de biblioteca engadiu carteis con información e curiosidades sobre Rosalía. Por exemplo... sabíades que o aeroporto de Santiago de Compostela chámase Rosalía de Castro?

"Naquel dialecto soave e mimoso, que queren facer bárbaro, os que non saben que aventaxa ás demais linguas en doçura e armonía"

CONTACONTOS EN FAMILIAS

 

Ao longo do curso, estamos a vivir unha actividade moi especial no cole. As familias están a chegar ás aulas de infantil para contar contos aos nosos pequenos e pequenas. Esta iniciativa está sendo todo un éxito, creando momentos cheos de emoción e aprendizaxe compartida. Os nenos e nenas gozan das historias contadas por aquelas persoas que forman parte da súa vida diaria, facendo da lectura unha experiencia aínda máis cercana e especial.

A participación das familias está a ser fundamental para motivar ao alumnado e para reforzar o vínculo entre a escola e o fogar. Cada conto é unha oportunidade para fomentar a imaxinación, a atención e o amor pola lectura, e estamos emocionados de ver como cada relato se converte nun momento máxico para todos. Agradecemos enormemente ás familias por sumarse a esta bonita actividade que sen dúbida deixará pegada nos nosos rapaces e rapazas.

CONTACONTOS INTERCICLOS: EXPERIENCIAS MÁXICAS DE CONTOS E COMUNICACIÓN

 

No cole, tivemos a sorte de vivir unha actividade moi interesante que uniu aos diferentes ciclos educativos do centro. O alumnado de segundo e terceiro ciclo de primaria tivo a oportunidade de compartir contos e historias co alumnado de infantil e primeiro ciclo de primaria. Esta actividade non só foi unha experiencia de aprendizaxe, senón tamén unha fermosa oportunidade para reforzar os lazos entre os distintos grupos de nenos e nenas do cole.

Un dos momentos máis especiais da xornada foi o conto contado por Anxo, un alumno do noso centro, quen utilizou o seu comunicador para contar unha historia. Anxo, cunha gran ilusión e grazas ao apoio do seu comunicador e de Marta e Paula, a súa PT e titora, logrou captar a toda a atención dos pequenos e pequenas. O seu conto, cargado de emoción e fantasía, fixo que todos os nenos e nenas quedaran totalmente absortos na súa narración. Foi un fermoso exemplo de como a comunicación pode superarse de maneiras sorprendentes e inclusivas, e un recordatorio de que as historias non teñen barreiras.

A actividade foi unha verdadeira celebración da lectura e da narración, onde todos os nenos e nenas se converteron en contadores de historias, facendo volar a súa imaxinación e transmitindo emocións a través das palabras. Os pequenos do infantil e do primeiro ciclo de primaria escoitaron con moita atención e participaron activamente nas historias, facendo preguntas e comentando as aventuras dos personaxes.

Queremos destacar a iniciativa e o compromiso do alumnado de segundo e terceiro ciclo, que se prepararon con moito entusiasmo para contar as súas historias e compartir ese momento máxico cos máis pequenos. A súa implicación foi un exemplo de colaboración e empatía, e a súa capacidade para transmitir emocións a través da palabra non deixou a ninguén indiferente.

Estamos moi orgullosos de ver como o noso alumnado se apoia mutuamente e compartimos a experiencia de aprender e crecer xuntos. A actividade de contacontos foi un verdadeiro éxito, e queremos agradecer á comunidade educativa do cole por facer posible estas fermosas iniciativas que fortalecen o noso espírito de colaboración e inclusión.

Seguiremos fomentando a lectura e a comunicación entre todos os ciclos, porque sabemos que estas experiencias son fundamentais para o crecemento e o desenvolvemento dos nosos rapaces e rapazas.

Grazas a todos e todas pola súa participación!