📚 Entroido entre contos: cando a literatura se viste de festa

 Este Entroido, o noso centro encheuse de historias, personaxes inesquecibles e moita imaxinación. O alumnado transformouse en protagonistas de libros e relatos coñecidos, convertendo os corredores do cole nun auténtico desfile literario.

Cada grupo escolleu unha obra ou universo narrativo diferente, achegándose tamén ás súas autoras e autores:

– 4º de EI mergullouse no mundo de Cocorico, de Marisa Núñez
– 5º de EI viaxou co Cangrejo ermitaño, tamén de Eric Carle
– 6º de EI deu vida a Antón Piñón, de Gabriela Keselman, Jose Carlos Andrés, Fran Pintadera
– 1º ciclo entrou no universo máxico de Harry Potter, creado por J. K. Rowling
– 3º de EP recreou o conto clásico de Brancaneves, recompilado polos Irmáns Grimm
– 4º de EP apostou polos personaxes da banda deseñada
– 3º ciclo encheu o cole de manchas brancas e negras cos Os 101 dálmatas, de Dodie Smith

Aínda que o mal tempo non nos permitiu saír ao exterior, celebramos un desfile dentro do propio centro, no que todo o alumnado puido amosar os seus disfraces e compartir este momento tan especial co resto da comunidade educativa.

Pero este Entroido foi moito máis ca unha festa: serviu tamén como oportunidade para investigar, descubrir novas obras literarias e achegarse a historias que, nalgúns casos, aínda non coñecían. A través desta proposta, a literatura converteuse en ocio, fonte de gozo e punto de encontro, reforzando a idea de que ler é tamén unha maneira de celebrar, crear e soñar.

Desde a biblioteca quixemos poñer en valor os libros como portas abertas á imaxinación, ao coñecemento e á emoción. Cada disfraz foi unha escusa perfecta para falar de contos, autoras e autores, personaxes e tramas, favorecendo o interese pola lectura desde unha experiencia vivencial e compartida.

Por motivos de protección de datos e da imaxe do alumnado, nesta ocasión non podemos acompañar a entrada con fotografías, pero gardamos na memoria un Entroido cheo de cor, creatividade e amor polos libros.

Porque cando a literatura entra no cole… todo cobra outro sentido.
Seguimos facendo da lectura unha festa. Seguimos facendo comunidade. ✨

✨ 23 de febreiro | Día de Rosalía de Castro ✨

Nestes días no cole celebramos o Día de Rosalía cunha actividade conxunta de todo o alumnado: elaboramos marcapáxinas con partes da obra de Rosalía, que despois repartimos por algúns comercios do barrio para sorprender ás súas clientas e clientes.

Porque a escola tamén sae ás rúas. Porque educar é facer comunidade. E porque a cultura medra cando se comparte 💫

Rosalía de Castro, voz imprescindible da nosa literatura, segue a acompañarnos co seu legado: unha poeta valente, fondamente vencellada á nosa lingua, á nosa identidade e aos sentimentos máis humanos. Achegala á infancia é sementar amor pola lectura e polo galego dende pequenos/as.

Grazas a todas as persoas que colaboraron nesta pequena gran acción 💙

ELMER E O DÍA DA PAZ

Con motivo do Día da Paz, a biblioteca converteuse nun espazo de encontro arredor da literatura e das emocións. Todo o alumnado participou na creación dun mural conxunto inspirado en Elmer, un elefante moi especial que non era gris coma os demais… e que, precisamente por iso, ás veces sentía que non encaixaba.

A través da lectura compartida da súa historia, achegámonos a temas tan necesarios como a diversidade, o respecto e a aceptación. As páxinas de Elmer abríronnos a porta a conversas profundas, adaptadas ás idades do noso alumnado, sobre o valor de ser quen somos e sobre a importancia de mirar ao outro con empatía.

Cada neno e cada nena deixou tamén unha pequena mensaxe escrita, dirixida a todas esas persoas que, nalgún momento, se senten diferentes. Palabras sinxelas, pero cheas de verdade, que nos lembran que ser distinto non é un problema: é un valor.

O mural resultante é moito máis ca unha obra colectiva: é o reflexo dun proceso no que a literatura serviu como fío condutor para educar en valores, fomentar a expresión emocional e construír pensamento crítico desde a infancia.

Porque a paz tamén nace nos contos, nas conversas ao redor dun libro e nas pequenas accións do día a día. Na capacidade de acompañar, de comprender e de facer comunidade.

Seguimos educando en valores.
Seguimos facendo comunidade. ✨

O ALUMNADO CONVÉRTESE EN CREADOR LITERARIO NESTE NADAL

 

Ao longo do mes de novembro e a primeira semana de decembro, o alumnado do centro estivo mergullado nun fermoso proxecto creativo: a elaboración de obras literarias e artísticas para participar no Certame Literario de Nadal 2025 da BiblioAnxo. Durante estes días, as aulas encheron de imaxinación, palabras, debuxos e historias cheas de espírito do Nadal.

O certame contou con diferentes modalidades adaptadas a cada ciclo:

• 2º ciclo de Educación Infantil: debuxo libre.

• 1º ciclo de Educación Primaria: debuxo narrado, combinando ilustración e unha pequena descrición.

• 2º ciclo de Educación Primaria: banda deseñada.

• 3º ciclo de Educación Primaria: narrativa (conto ilustrado).

En todas as modalidades, a temática común foi o Nadal, e os traballos estiveron redactados en lingua galega, da man do EDLG, promovendo así a creatividade e o uso da nosa lingua. A participación foi individual e todos os traballos realizáronse na aula. Ademais, cada titoría fixo unha preselección dos traballos, que foron entregados ao equipo de biblioteca asinados cun pseudónimo, garantindo a confidencialidade do alumnado.

O equipo da BiblioAnxo actuará como xurado, valorando as obras presentadas. O certame contará con tres premios por ciclo, consistentes en libros e/ou material didáctico, e ademais haberá un premio especial, xa que un dos debuxos gañadores ilustrará a postal de Nadal do cole. A data límite de entrega foi o 9 de decembro.

O día 19, durante o festival, farase a entrega de agasallos para o alumnado gañador.

Desde a biblioteca queremos felicitar a todo o alumnado polo seu esforzo, ilusión e creatividade, así como agradecer o gran traballo do profesorado por fomentar o gusto pola escritura, a expresión artística e a lectura. Moi pronto compartiremos os traballos gañadores… ✨📚🎄

💜 25N: Os contos como ferramenta para educar en igualdade

 

Con motivo do 25 de novembro, Día Internacional da Eliminación da Violencia contra as Mulleres, desde a BiblioAnxo puxemos en marcha un traballo común en todo o centro, no que participou todo o alumnado, e que tivo como fío condutor os valores que transmiten os contos.

Ao longo destes días, as aulas achegáronse a diferentes historias que falan de igualdade, respecto, coeducación, liberdade, amizade, bo trato e convivencia pacífica. A través da lectura, da reflexión compartida e da expresión artística, o alumnado puido comprender, desde idades moi temperás, a importancia de rexeitar calquera tipo de violencia e promover relacións baseadas no respecto mutuo.

Cada grupo achegou a súa mirada, adaptando a visión á súa etapa educativa, pero sempre cun mesmo obxectivo común: educar en valores para construír unha sociedade máis xusta, igualitaria e libre de violencia. O resultado foi un traballo colectivo cheo de mensaxes positivas, simbolismo e compromiso, que amosa que, desde a escola, tamén se pode e se debe traballar pola igualdade.

Desde a biblioteca queremos agradecer a implicación do profesorado e do alumnado neste proxecto tan necesario, así como poñer en valor o poder dos contos como ferramenta educativa para axudar a comprender o mundo e transformalo 💜📚.

FORMACIÓN AO VOLUNTARIADO DE 5º E 6º DE EP

Esta semana, o alumnado voluntario de 5º e 6º de Primaria está a recibir formación para colaborar na dinamización da nosa biblioteca escolar durante o tempo de recreo e nas horas de ler.

A través destas sesións, están aprendendo tarefas fundamentais como a catalogación e colocación dos fondos, o coñecemento da CDU para organizar os libros por temáticas, e tamén a xestión dos xogos de mesa dispoñibles para o tempo de lecer.

👏 Grazas ao seu entusiasmo e compromiso, a nosa biblioteca converterase nun espazo aínda máis activo, participativo e cheo de vida. ¡Bo traballo, equipo BiblioAnxo! 💫

📚 CHEGOU O DÍA DA INAUGURACIÓN 🦉

O pasado 24 de outubro celebrouse o Día das Bibliotecas, pero no CEIPP Anxo da Garda tivemos un motivo especial para festexalo un pouco máis tarde. O 27 de outubro foi o noso día grande, xa que inauguramos oficialmente a nova biblioteca escolar do centro.

No acto contamos coa presenza do noso Inspector de educación, representantes do Concello da Coruña, o equipo directivo do IES Monte das Moas, antigos alumnos, membros do Consello Escolar, da AFA e, por suposto, todo o profesorado do colexio, que compartiu con entusiasmo este momento tan especial.

Foi un acto moi emotivo, cheo de lembranzas, agradecementos e ilusión polo que está por vir. Agora si, a nosa biblioteca BiblioAnxo abre as súas portas para converterse nun verdadeiro lugar de encontro, de lectura, de aprendizaxe compartida e de soños que voan entre libros. 💫📖

Deixámosvos un enlace á nova de prensa:

https://www.laopinioncoruna.es/coruna/2025/10/28/ninos-reviven-corazon-anxo-da-123086470.html