Este mes de setembro, a nosa biblioteca experimentará unha transformación que agardamos mellorará significativamente o espazo de lectura, xogo e gozo, buscando un ambiente máis moderno, funcional e atractivo para todos.
Ao longo do primeiro trimestre, realizaremos varias melloras clave que cambiarán a imaxe da nosa biblioteca. En primeiro lugar, renovaremos o chan, instalando tarima de PVC que garanta a máxima comodidade. Tamén nos centramos na renovación estética das paredes, que serán pintadas cunha nova capa de pintura para crear un ambiente máis luminoso e inspirador. Queremos que a biblioteca non só sexa un espazo de aprendizaxe, senón tamén un lugar agradable onde tanto o alumnado, as mestras/es e fas familias se sintan cómodos e motivados.
Outra das accións que levaremos a cabo será a realización de tarefas de expurgo no fondo bibliográfico. Durante este proceso, retiraremos aqueles libros que xa non se atopan en bo estado ou que están desactualizados, facendo espazo para novos materiais que serán máis útiles para a comunidade educativa. Co fin de mellorar a xestión e accesibilidade dos nosos recursos, tamén trasladaremos todos os libros á base de datos Koha, un sistema de xestión bibliotecaria que permitirá organizar e catalogar de maneira máis eficiente os libros e materiais dispoñibles. A partir de agora, será moito máis fácil para o alumnado e o profesorado acceder aos libros e recursos de maneira rápida e ordenada.
Pero non só se trata dunha mellora física. Tamén estamos a planificar unha serie de actividades para dinamizar a biblioteca e aproveitar ao máximo os novos espazos. Ao longo do primeiro trimestre, organizaremos exposicións e actividades culturais en diferentes espazos da biblioteca, para que tanto o alumnado como as familias poidan disfrutar de experiencias enriquecedoras relacionadas co mundo dos libros e a lectura. Queremos que a nosa biblioteca sexa un lugar vivo, de encontro e de creatividade, que inspire a ler e a aprender de forma divertida e participativa.
Esta reforma na nosa biblioteca é só o comezo dun proxecto máis amplo de mellora e actualización dos recursos educativos do centro. Cremos que un espazo de lectura renovado e ben organizado é fundamental para o proceso de aprendizaxe dos nosos alumnos e alumnas, e estamos seguros de que este investimento terá un impacto positivo na súa motivación e no seu rendemento académico.
Agradecemos a toda a comunidade educativa pola súa comprensión e apoio durante este proceso de reformas. Estamos emocionados por ver como a nosa biblioteca se converterá nun espazo máis moderno e funcional, onde tanto grandes como pequenos poidan disfrutar da lectura e do coñecemento.
Seguimos traballando para facer da nosa biblioteca un lugar mellor para aprender, soñar e crecer.